ကိုယ်အလေးချိန်လျှော့ချဖို့နဲ့ ခန္ဓာကိုယ်တွင်း ဇီဝကမ္မဖြစ်စဥ်တွေကို ကောင်းမွန်စေဖို့ ကမ္ဘာတစ်ဝန်းမှာ ခေတ်စားနေတဲ့ နည်းလမ်းတစ်ခုဖြစ်တဲ့ Intermittent Fasting ကို တော်တော်များများ ကြားဖူးနေကြမှာပါ။ သူက အထူးသဖြင့် ဝိတ်လျော့ဖို့ ဘာတွေစားရမလဲ ဆိုတာထက် “ဘယ်အချိန်မှာ စားရမလဲ” ဆိုတဲ့ အချိန်ဇယားကို အဓိကထားတဲ့ စားသောက်မှုပုံစံတစ်ခု ဖြစ်ပါတယ်။ ဥပမာ ၈နာရီအတွင်းပဲ အစားစားပြီး ၁၆နာရီကြာ အစားမစားတာ၊ နောက်တစ်နည်းက တစ်ပတ်မှာ ၅ ရက် ပုံမှန်စားပြီး ကျန်တဲ့ ၂ ရက်မှာ သေချာ ကယ်လိုရီလျှော့စားတာ စသဖြင့် ကိုယ်နဲ့အဆင်ပြေမဲ့ နည်းလမ်းတွေလည်း ရွေးချယ်နိုင်ပြီး ဝိတ်လည်းကျစေလို့ အဆင်ပြေလှပါတယ်။ ဒါပေမဲ့ ဘယ်အရာမဆို ကောင်းကျိုး၊ဆိုးကျိုး ဒွန်တွဲရှိနေတာမို့ Fasting မှာလည်း နည်းလမ်းမမှန်တဲ့အခါ ခန္ဓာကိုယ်အတွက် ဆိုးကျိုးတွေရှိနိုင်တာမို့ ကိုယ်နဲ့ကိုက်ညီတဲ့ နည်းလမ်းကောင်းလေးတွေ ရွေးချယ်နိုင်ဖို့နဲ့ သိထားသင့်တဲ့ ကောင်းကျိုး၊ ဆိုးကျိုးလေးတွေကို အတူကြည့်လိုက်ရအောင်။

ခန္ဓာကိုယ်အပေါ် သက်ရောက်မှုတွေ

လေ့ကျင့်ခန်းတွေ လုပ်နေပေမဲ့လည်း အစားစားတာကို မထိန်းချုပ်နိုင်ရင် ဒီစားတာတွေကနေ ရရှိတဲ့ စွမ်းအင်တွေကိုပဲ ခန္ဓာကိုယ်က ချေဖျက်သုံးစွဲတဲ့အတွက် အဆီဓာတ်လျော့ကျမှုနှုန်း နည်းပါတယ်။ အခုလို Festing နည်းလမ်းမှာတော့ အချိန်ပိုင်း အစာလုံးဝမစားတဲ့အတွက် ရှိရင်းစွဲ သကြားဓာတ် ကုန်ခမ်းသွားပြီး လိုအပ်တဲ့ စွမ်းအင်အတွက် အဆီတွေကို ပိုပြီး ချေဖျက်အသုံးပြုရတဲ့ဖြစ်စဥ်ကို အခြေခံထားတာမလို့ ကိုယ်အလေးချိန်လျော့ချနိုင်စွမ်း မြင့်တာပါ။

• ဒီလိုနာရီပိုင်း အစားရှောင်လိုက်တာက ကိုယ်ခန္ဓာအတွင်းက ဆဲလ်တွေ၊ ဟော်မုန်းတွေနဲ့ ကိုယ်တွင်းအဂါတွေအထိမှာပါ သိသာတဲ့ အပြောင်းအလဲတွေ စဖြစ်လာပါတယ်။ 
• အင်ဆူလင် (Insulin) ပမာဏ သိသိသာသာ ကျဆင်းသွားပြီး သိုလှောင်ထားတဲ့ အဆီတွေကို စွမ်းအင်အဖြစ် လောင်ကျွမ်းဖို့ ပိုမိုလွယ်ကူစေပါတယ်။ တစ်ချိန်တည်းမှာပဲ ကြွက်သားတွေကို ထိန်းသိမ်းပေးတဲ့ Growth Hormone တွေ မြင့်တက်လာပါတယ်။ 
• အထူးသဖြင့် ဆဲလ်ဟောင်းတွေနဲ့ အဆိပ်အတောက်တွေကို ဖယ်ရှားပစ်ကာ ခန္ဓာကိုယ်တွင်း စနစ်တစ်ခုလုံးကို အသစ်ပြန်လည် လန်းဆန်းစေတာပဲ ဖြစ်ပါတယ်။

ကောင်းကျိုး၊ ဆိုးကျိုးတွေ

အပြင်းအထန်ကိုမှ အားကစားနဲ့ လေ့ကျင့်ခန်းတွေလုပ်ပြီး ဝိတ်ချတာထက် အစားလျော့တဲ့နည်းလမ်းကိုသာ ပိုမိုလွယ်ကူလို့ တော်တော်များများ ရွေးချယ်တတ်ကြပါတယ်။

• ပုံမှန် Diet လုပ်တာတွေထက် ပိုလွယ်ကူပြီး အစားအစာတွေကို ကယ်လိုရီတွက်နေစရာ မလိုဘဲ စားနိုင်ပါတယ်။ အင်ဆူလင်ပမာဏကို လျော့ကျစေပြီး အဆီလောင်ကျွမ်းမှုကို အားပေးတာကြောင့် ကိုယ်အလေးချိန်ကျစေပါတယ်။ 
• နောက်ပြီး နှလုံးကျန်းမာရေးမှာလည်း သွေးတိုးနဲ့ ကိုလက်စထရော ပမာဏကို ကျဆင်းစေပါတယ်။ ဦးနှောက်ဆဲလ်သစ်များ ဖြစ်ပေါ်မှုကို အားပေးပြီး မှတ်ဉာဏ်ကို ကောင်းမွန်စေတာကြောင့် ဦးနှောက်ကျန်းမာရေးအတွက်လည်း ကောင်းမွန်စေပါတယ်။

Festing မှာက အားလုံးလိုက်ပါလုပ်ဆောင်နိုင်တဲ့ နည်းလမ်းတွေ ရှိတာကြောင့် အတူစလုပ်ကြည့်နိုင်ပြီး ဖြစ်လာနိုင်တဲ့ ဆိုးကျိုးတွေကိုပါ ဂရုပြုထားသင့်တာပါ။

• စစလုပ်တဲ့အခါ ဗိုက်ဆာတဲ့ဒဏ်ကို ခံနိုင်ရည်မရှိသေးတဲ့အပြင် အစားပြန်စားရတဲ့အခါ ဗိုက်အရမ်းဆာခဲ့တဲ့အတွက် ပုံမှန်ထက် အလွန်အကျွံ ပိုစားမိတတ်ပါတယ်။ 
• တစ်ချို့အမျိုးသမီးတွေမှာ အပြင်းအထန် Festing လုပ်မိမယ်ဆို ရာသီစက်ဝန်းမမှန်ဘဲ ဟော်မုန်းအပြောင်းအလဲတွေ ရှိနိုင်ပါတယ်။ Festing အချိန်အတွင်းမှာလည်း ခေါင်းကိုက်တာ၊ စိတ်တိုလွယ်တာ၊ နုံးခွေတာတို့လည်း ဆာလောင်ခြင်းရဲ့ နောက်ဆက်တွဲအနေနဲ့ အဖြစ်များတတ်ပါတယ်။

မှန်ကန်တဲ့ စားပုံစားနည်းတွေ

ခန္ဓာကိုယ်ကို မထိခိုက်စေဘဲ ထိရောက်တဲ့ ရလဒ်ရဖို့ဆိုရင် …

• အစားဖြတ်ချိန်ကို စစချင်း ၁၂နာရီ ကနေ စတင်ပြီးမှ ဖြည်းဖြည်းချင်း ၁၆နာရီထိ တိုးပြီး လုပ်ကြည့်ပါ။ 
• အစားမစားဖြစ်ချိန်မှာလည်း အဆာခံအောင် ရေဓာတ်ပုံမှန်ဖြည့်တင်းပေးပြီး၊ ကော်ဖီ၊ နွားနို့တို့ကို သောက်ပေးနိုင်ပါတယ်။
• စားမဲ့ ၈နာရီအတွင်းမှာလည်း တစ်နေ့တာ ကယ်လိုရီထက် ကျော်ပြီး အဆီအစိမ့်နဲ့ အချိုတွေ အစားမများအောင် ဂရုပြုပေးရပါမယ်။
• ဒါကြောင့် အစားပြန်စားရမဲ့ အချိန်မှာ အသင့်စား အစားအစာတွေထက် အသားငါး၊ ဟင်းသီးဟင်းရွက်နဲ့ အာဟာရပြည့်ဝတာတွေကို ဦးစားပေး စားပေးရပါမယ်။
• ခန္ဓာကိုယ် အနားယူတဲ့ ညဘက်အချိန်တွေမှာ အစားရှောင်သင့်တာမလို့ ၈နာရီဖြစ်ရင်ပြီးရော ည ၈နာရီကနေ မနက်၄နာရီထိ စားတာတွေတော့ မလုပ်သင့်ပါဘူး။ 

ကိုယ့်ခန္ဓာကိုယ်ကိုလည်း အမြဲတမ်းလေ့လာပြီး Festing ကြောင့် အလွန်အမင်း မူးဝေနုံးချိလာရင် အကုန်ရပ်လိုက်ကာ ကျွမ်းကျင်ရာဆရာဝန်တဲ့ တိုင်ပင်ပြသဖို့ အရေးကြီးဆုံးပါပဲ။

Fasting လုပ်တာက အခုချက်ချင်း လိုချင်တဲ့ ရလဒ်ရတာမျိုး မဟုတ်ဘဲ စည်းကမ်းရှိရှိနဲ့ ကျန်းမာရေးကို ရေရှည်ရင်းနှီးမြှုပ်နှံတဲ့ နည်းလမ်းတစ်ခုဖြစ်ပါတယ်။ ကိုယ့်ခန္ဓာကိုယ်ရဲ့ တုံ့ပြန်မှုကို ဂရုစိုက်ပြီး စနစ်တကျ ဆောင်ရွက်မယ်ဆိုရင် ပိုမိုကျန်းမာပြီး အားအင်ပြည့်ဝတဲ့ နေ့ရက်တွေကို ပိုင်ဆိုင်နိုင်မှာ အမှန်ပါပဲ။